​យុគសម័យ​កាល​របស់​លោក Jurgen Klopp នៅឯ​ក្លិប Liverpool នឹង​ចាប់ផ្តើម​នៅ​ល្ងាច​ថ្ងៃ​សៅរ៍​នេះ (​ម៉ោង​នៅ​កម្ពុជា​) នៅពេលដែល​គ្រូបង្វឹក​សញ្ជាតិ​អាល្លឺម៉ង់​រូបនេះ ចាប់ផ្តើម​ប្រកួត​ក្នុង​ក្របខ័ណ្ឌ Premier League ជា​លើក​ទី​១​របស់លោក​នៅពេល​ប៉ះ​ជាមួយនឹង​ក្រុម Tottenham Hotspur​។

​លោក Klopp ត្រូវបានតែងតាំង​ជា​អ្នក​ជំនួស​លោក Brendan Rodgers ក្នុង​កិច្ចសន្យា​រយៈពេល​៣​ឆ្នាំ​ដើម្បី​សង្គ្រោះ​ក្រុម Liverpool ដែល​បានឈ្នះ​ត្រឹមតែ​១​លើក​គត់​ក្នុងចំណោម​ការប្រកួត​៩​លើកចុងក្រោយរ បស់​ពួកគេ​ក្នុង​រយៈពេល​៩០​នាទី​ក្នុង​រាល់​ការប្រកួត​ទាំងអស់​។

​គ្រូបង្វឹក​រូបនេះ​ប្រហែលជា​ពេញចិត្ត​ក្នុង​លេង​ក្នុងផ្ទះ​ខ្លួនឯង សម្រាប់​ការប្រកួត​ជា​លើក​ទី​១​របស់លោក​ជាង​នៅលើ​កីឡដ្ឋាន White Hart Lane ដែលជា​កន្លែង​ដែល​ក្រុម Spurs បាន​បំបាក់​ក្រុម Manchester City យ៉ាង​ចាស់ដៃ​ក្នុង​លទ្ធផល ៤-១ ក្នុងការ​ប្រកួត​លើក​ទឹកដី​ខ្លួនឯង​ចុងក្រោយ​របស់​ពួកគេ ប៉ុន្តែ លោក​ចង់​ឲ្យ​កីឡាករ​របស់លោក​ទទួល​យក​ការ​ប្រជែង​មួយ​នេះ​។​

​លោក Klopp ដែល​ក្រុម​របស់លោក​កំពុងតែ​ស្ថិតក្នុង​ចំណាត់ថ្នាក់​លេខ​១០​នៅលើ​តារាង ដោយ​ដេញតាម​ពីក្រោយ​ក្រុម Tottenham ចំនួន​១​ពិន្ទុ​នោះ បាន​ឲ្យ​ដឹងថា​៖ «​រឿង​មួយចំនួន​ដែល​អ្នក​អាចធ្វើ​ការផ្លាស់ប្តូរ​បាន​ភ្លាមៗ​គឺ ស្មារតី និង​ការត្រៀម​លក្ខណៈ​ឲ្យ​បាន​រួចរាល់​»​។

​គ្រូបង្វឹក​រូបនេះ​បាន​ប្រាប់​បន្តថា​៖ «​នោះ​គឺជា​អ្វីដែល​អ្នក​អាចធ្វើ​ការផ្លាស់ប្តូរ​បាន​។ ក្នុងការ​ធ្វើការ​ផ្លាស់ប្តូ​រ​អ្វីៗ​ទាំងស្រុង​ក្នុង​ក្រុម​មួយ​គឺ ត្រូវការ​ពេលវេលា ប៉ុន្តែ ខ្ញុំ​ពិតជា​មិន​ចាប់អារម្មណ៍​ទៅលើ​បញ្ហា​ផ្សេងៗ​ដែល​យើង​អាច​មាននៅ ថ្ងៃ​សៅរ៍​នេះឡើយ​។

​ខ្ញុំ​ចង់​មើលឃើញ​ភាពក្លាហាន​បន្ថែមទៀត ភាព​រីករាយ​បន្ថែមទៀត​ក្នុង​ក្រសែភ្នែក​របស់​ពួកគេ​។ ខ្ញុំ​ចង់​ឃើញថា ពួកគេ​ចូលចិត្ត​អ្វីដែល​ពួកគេ​ធ្វើ​។ ខ្ញុំ​បាន​មើលឃើញ​ចំណុច​នោះ​ក្នុងពេល​ហ្វឹក​ហាត ហើយ​នោះ​គឺជា​រឿង​ដ៏​ល្អ​»​។ ការប្រកួត​នៅ​ថ្ងៃ​សៅរ៍​នេះ​នឹង​ចាប់ផ្តើម​នៅ​ម៉ោង​៦:៤៥​ល្ងាច​៕

​ការជួបគ្នា​៣​លើកចុងក្រោយ​រវាង​ក្រុម​ទាំងពីរ​
11.02.15          Liverpool ៣-២ Tottenham
31.08.14          Tottenham ០-៣ Liverpool
30.03.14          Liverpool ៤-០ Tottenham

​ប្រភព​៖ cambosport